Նիկոլի ցինիզմը

Նիկոլ Փաշինյանն առավոտյան ֆեյսբուքյան լայվով խոսել է Շուշիի մասին:
Այս անբովանդակ ու անիմաստ լայվը նախապատմություն ունի։
Դեռ անցյալ շաբաթ Փաշինյանը խորհրդարանական ամբիոնից հերթական անհաջող հայտարարությունն էր արել՝ Կասկածի տակ դնելով Շուշիի հայկականությունը։
Հունվարի 28-ին, Եռաբլուր զինվորական պանթեոնում լրագրողի կողմից հարց տվեց Փաշինյանին, թե արդյոք Շուշին հայկական քաղա՞ք է, թե՞ չէ, ինչին վարչապետը խորհուրդ տվեց գրավոր հարցը ներկայացնել և ինքը կպատասխանի:
Վարչապետին հարց ուղղած լրագրող Լիա Սարգսյանը հարցը պաստառի վրա գրած Կառավարության շենք էր գնացել, սակայն Փաշինյանի աջակիցներից մի կին պատռեց լրագրողի պաստառը, իսկ լրագրողին օրվա ընթացքում երկու անծանոթ մարդիկ հետապնդել են։ Ահա, այսպես է նախկին լրագրող ու խմբագիր Նիկոլ Փաշինյանը պատկերացնում ժողովրդավարությունը
Հունվարի 20-ին Ազգային Ժողովում Փաշինյանը հռետորական հարց էր հնչեցրել, թե արդյոք Շուշին հայկական է, քանի որ մինչև հակամարտությունը սկսվելը նրա բնակչության 90 տոկոսից ավելին ադրբեջանցիներ էին: Այն մասին, որ մինչեւ Ադրբեջանի խորհրդայնացումը, Շուշիում բնաջնջվել էր հայ բնակչությունը, նա չէր հիշատակել: Այսօրվա լայվում նա, ըստ էության, պնդում էր նույնը, չգիտես ինչու պնդելով, թե լրագրողները մանիպուլացնում են իր խոսքերը։
Հիմա՝ ըստ Էության։
Նիկոլ Փաշինյանը ճակատագրական սխալը գործել է ոչ այսօր, ոչ էլ՝ հունվարի 20-ին, այլ՝ հոկտեմբերի 19-ին, երբ մերժել է ռազմական գործողությունները դադարեցնելու վերաբերյալ Վլադիմիր Պուտինի առաջարկությունը։
Եթե հոկտեմբերի 19-ին կանգնեցվեր պատերազմը, Շուշին կմնար հայկական վերահսկողության տակ, հայկական կողմը կկորցներ միայն Արցախի հարավային երկու շրջան։ Հոկտեմբերի 19-ի դրությամբ մենք պաշտոնապես ունեինք 729 զոհ(իրականում՝ մոտ 1500), այլ խոսքով՝ մարդկային ու տարածքային կորուստի տեսանկյունից՝ վիճակն այսքան աղետալի ու ողբերգական չէր լինի։
Էլ չեմ ասում այն մասին, որ ադրբեջանցիների Շուշի վերադառնալու թեզն արհեստական է․ այնտեղ խաղաղ բնակչություն չկա նույնիսկ հիմա, երբ հինավուրց հայկական քաղաքը գտնվում է ադրբեջանական վերահսկողության տակ։
Սակայն հոկտեմբերի 19-ին Փաշինյանը դեռ «դուխով» «հաղթում» էր ու «դուխով» էլ մանիպուլացնում էր մեր հասարակությանը և գործել է ճակատագրական սխալ, ինչն հիմա անհաջող կերպով փորձում է սրբագրել տարբեր տեսակի «կրուտիտներով»։
Փաշինյանի գլոբալ ստերին չենք ուզում անդրադառնալ, որովհետև դրանք հերքվել են ոչ միայն Ռուսաստանի նախագահի, այլ նույնիսկ՝ մեր ԱԳՆ-ի կողմից։
Միայն հավելենք, որ Փաշինյանի խոտոր տրամաբանությամբ ստացվում է, որ նա հանձնել է Շուշին, հազարավոր տղաների կյանքեր է զոհաբերել, որպեսզի ադրբեջանցի փախստակաները չվերադառնան Շուշի։ Համաձայնեք՝ նման մտածողություն ունեցող անհատով պետք է զբաղվեն ոչ թե քաղաքական մասնագիտություն ունեցող մարդիկ, այլ՝ առողջապահական ոլորտի կոնկրետ մասնագետներ։