Պետական գույքի կառավարման կոմիտեի նախագահ Նարեկ Բաբայանն աշխատանքից ազատման դիմում է ներկայացրել, այս մասին նա տեղեկացրել է ֆեյսբուքյան իր էջում։
Նրա գրառումը ստանդարտ է ու չի բացահայտում հրաժարականի պատճառները։ Այս հրաժարականին, թերևս, չէինք անդրադառնա, եթե չլինեին երկու կարևոր հանգամանքներ։
Բաբայանը Փաշինյանի թիմի առանցքային անդամ է, նրա ՔՊ կուսակցության վարչության անդամ է ու նաև՝ ԱԺ փոխնախագահ Լենա Նազարյանի ամուսինը։ Եվ ահա, իրազեկ աղբյուրներն ասում են, որ Նարեկ Բաբայանն, ըստ էության, պաշտոնանկ է եղել՝ հարելով ներկուսակցական այն թիմին, որը մտադիր է եղել շաբաթներ առաջ ներքին հեղաշրջում անել՝ վարչապետի պաշտոնին կարգելով Արարատ Միրզոյանին։
Միրզոյանի հետ կապված սկանդալից հետո Փաշինյանի թիմի ներսում «ասող» է դարձել Սուրիկ Պապիկյանը, որն էլ լուծել է Բաբայանի պաշտոնանկության հարցը՝ չնայած, որ Լենա Նազարյանն Աննա Հակոբյանի միջոցով փորձել է փրկել իրավիճակը։
Սակայն ՔՊ ներքին «բազարները» թողնենք դրանց անփառունակ տերերին ու խոսենք արտառոց այլ փաստի մասին, որն ամբողջովին բացահայտեց Փաշինյանի թիմի մերկությունը։
Նարեկ Բաբայանի փոխարեն՝ Պետական գույքի կառավարման կոմիտեի նախագահ է նշանակվել Արարատի նախկին մարզպետ Գարիկ Սարգսյանը՝ կոկորդիլոսների գծով «գլխավոր մասնագետը»։ Նույնիսկ հեկտարի մասին տարրական պատկերացում չունեցող այս ոչնչությունը նշանակվում է գրեթե նախարարական պաշտոնի՝ միայն այն բանի համար, որ Փաշինյանի սանիկն է։
Լուրջ կադրերն այլևս չեն ուզում աշխատել Փաշինյանի թիմի հետ, ու նա պետական համակարգը լցնում է իր անգրագետ «զեմլյակներով» ու սանիկներով՝ երկիրը վերածելով մեկ ընտանիքի բոստանի կամ քաքիստոկրատիայի, այլ խոսքով՝ սարսափելի անբարեխիղճ մադկանցով համալրված կառավարման համակարգի։
