«Պաշտպանության նախարար Իրակլի Ղարիբաշվիլին առաջադրվել է Վրաստանի վարչապետի պաշտոնում», – այս մասին տեղեկացրել է իշխող «Վրացական երազանք» կուսակցության նախագահ Իրակլի Կոբախիձեն։
Իրակլի Ղարիբաշվիլին 2013-2015 թվականներին արդեն իսկ զբաղեցրել է Վրաստանի վարչապետի պաշտոնը։
Փորձագետները կանխատեսում են, որ Ղարիբաշվիլիի ընտրությունը կարող է խորացնել քաղաքական ճգնաժամը, որովհետև նա ընդդիմության նկատմամբ ավելի կոշտ քաղաքականության կողմնակից է։
Թերևս, դրանով է պայմանավորված Վաշինգտոնից երեկ ուշ երեկոյան հնչած ուղերձը։
ԱՄՆ Պետդեպարտամենտը Վրաստանի իշխանություններին և ընդդիմադիր ուժերին զսպվածության ու իրավիճակի էսկալացումից խուսափելու կոչ է արել, հայտարարել է Պետդեպարտամենտի մամուլի ծառայության ղեկավար Նեդ Փրայսը:
«ԱՄՆ-ը խորապես մտահոգված է Վրաստանում տեղի ունեցող քաղաքական վերջին զարգացումներից: Կոչ ենք անում կողմերին զսպվածություն ցուցաբերել, խուսափել իրավիճակն ապակայունացնող ու բռնության հանգեցնող գործողություններից ու հայտարարություններից»,- հայտարարել է ամերիկացի պաշտոնյան:
Բաժանորդագրվեք մեզ Youtube-ում
