Արտահերթի գործընթացը սկսվեց․ կարևորը՝ որակն է

Նիկոլ Փաշինյանը կառավարությունում հանդիպում է ունեցել Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանի հետ:
Նիկոլ Փաշինյանը և Էդմոն Մարուքյանը հանդիպման ընթացքում պայմանավորվել են խորհրդակցությունները շարունակել՝ ի նպաստ քաղաքական ճգնաժամի հանգուցալուծման:
Քաղաքական կոնսուլտացիաները մեկ հանդիպմամբ չեն ավարտվում, սակայն այնպիսի տպավորություն է, որ հենց այսօր տրվել է արտահերթ ընտրության գործընթացի մեկնարկը։
Իհարկե, ընտրություն կոչվածն ավելի տարողունակ գործընթաց է, քան՝ ժամկետների հստակեցումը և այլ կառուցակարգային հարցերի քննարկումը։
Քաղաքական ճգնաժամը կհաղթահարվի, եթե հասարակությունն իրական, բովանդակային ընտրության հնարավորություն ստանա։ Սա համար անհրաժեշտ է որոշակի աշխատանք՝ քաղաքական, օրենսդրական բաղադրիչներով։
Բարեփոխումների անհրաժեշտություն ունի հատկապես Ընտրական օրենսգիրքը, որը պետք է ձերբազատվի ռեյտինգային ընտրակարգից, կայուն մեծամասնության դրույթից։
Բայց նաև կարևոր է, որպեսզի առաջիկա ընտրությունները չդիտվեն «սևի» ու «սպիտակի» հակադրության, գործող իշխանության մեխանիկական վերարտադրության կամ հին համակարգի ռեստավրացիայի ռևանշիստական օրակարգի համատեքստում։ Քաղաքացին պետք է բովանդակային ընտրության հնարավորություն ստանա, որպեսզի մեծանա հասարակության սուբեկտությունը։ Սա է քաղաքական ճգնաժամի հաղթահարման բանալին։