Ռոբերտ Քոչարյանին հարող կայքերից մեկը գրում է, թե առնվազն մեկ տասնյակի հասնող կուսակցություններ պատրաստակամություն են հայտնել միավորվել երկրորդ նախագահ Ռոբերտ Քոչարյանի շուրջը, նրա հետ դաշինքով և Քոչարյանի լիդերությամբ մասնակցել ընտրություններին, որով նաև ընդդեմ Նիկոլ Փաշինյանի մեծ ճակատ կձևավորեն:
Զուտ թվաբանության իմաստով ներկայացված թիվը գուցե մոտ է իրականությանը, սակայն «մեկ տասնյակի հասնող կուսակցություններն» իրականում կշիռ չունեն, մարդ-կուսակցություններ են, որոնք հիմնականում մաս են կազմում ամբողջապես սպառված «Հայրենիքի փրկության շարժմանը»։ Ավելին, այդ կուսակցությունների զգալի մասը վաղուց է հարում կամ սատարում Քոչարյանին՝ վերջին երկու տարիներին ապահովելով նրա դատավարությունների ոչ տպավորիչ «մասսովկան»։
Իրականում՝ Քոչարյանի գործերն այնքան էլ հաջող չեն ընթանում։ Մի կողմից, սոցհարցումները ցույց են տալիս, որ նա հույս կարող է դնել առավելագույնը տասը տոկոս վարկանիշի վրա, մյուս կողմից՝ երկրորդ նախագահին սատարելու հարցում ակտիվ դիրքորոշում չեն ցուցաբերում ՀՅԴ-ն ու ՀՀԿ-ն։ Ավելին, Սերժ Սարգսյանի շրջապատում այդ սցենարը նույնիսկ բացառում են։
Բաժանորդագրվեք մեզ Youtube-ում
