Ռուսաստանի Դաշնության նախագահ Վլադիմիր Պուտինը ապրիլի 7-ին Նիկոլ Փաշինյանի հետ կքննարկի Լեռնային Ղարաբաղում խնդիրների կարգավորմանն ուղղված քայլերն ու ինտեգրման գործընթացները:
Այս մասին գրում է «ՌԻԱ Նովոստի»-ն՝ Կրեմլի մամուլի ծառայությանը հղումով:
«Ապրիլի 7-ին Մոսկվայում տեղի կունենան Ռուսաստանի նախագահ Վլադիմիր Պուտինի և ՀՀ վարչապետ Նիկոլ Փաշինյանի բանակցությունները: Փաշինյանն աշխատանքային այցով կժամանի Ռուսաստան: Նախատեսվում է դիտարկել Ռուսաստանի, Հայաստանի և Ադրբեջանի ղեկավարների միջև 2020 թվականի նոյեմբերի 9-ի և 2021 թվականի հունվարի 11-ի Լեռնային Ղարաբաղի վերաբերյալ հայտարարությունների կատարումը, ինչպես նաև տարածաշրջանում առկա խնդիրների լուծման հետագա քայլերը, մասնավորապես, Հարավային Կովկասում տնտեսական և տրանսպորտային կապերի վերականգնման համատեքստում», – ասվում է հաղորդագրության մեջ:
Բացի այդ, նախատեսվում է քննարկել հայ-ռուսական ռազմավարական գործընկերության և դաշինքի զարգացումը, ինչպես նաև եվրասիական տարածքում ինտեգրացիոն միություններում փոխգործակցության հեռանկարները:
Բաժանորդագրվեք մեզ Youtube-ում
