Բարձրագույն դատական խորհրդի նախագահ Ռուբեն Վարդազարյանի դեմ քրեական գործ է հարուցվել։ Այս մասին երեկ հայտարարել է Հայաստանի գլխավոր դատախազի խորհրդական Գոռ Աբրահամյանը՝ հավելելով, որ քրեական գործի մանրամասները հրապարակման ենթակա չեն։
Աբրահամյանը նաև նշել է, որ գործի հարուցման համար ԲԴԽ համաձայնությունը չի պահանջվում, քանի որ այն կապված չէ Վարդազարյանի մասնագիտական գործունեության հետ։
Բարձրագույն դատական խորհուրդը որոշում է կայացրել Ռուբեն Վարդազարյանի լիազորությունները կասեցնել որպես դատավոր և որպես ԲԴԽ անդամ (նախագահ)՝ մինչև վերջինիս նկատմամբ հարուցված քրեական գործով վարույթի ավարտը:
Բարձրագույն դատական խորհրդի նախագահի պարտականությունները կիրականացնի Խորհրդի տարիքով ավագ անդամ՝ Բարձրագույն դատական խորհրդի գիտնական-անդամ Գագիկ Ջհանգիրյանը:
Այն, որ Վարդազարյանը կապված է հին համակարգի առանցքային դեմքերի հետ՝ կասկածից վեր է․ դրա մասին հայտարարել են թե Վարդազարյանը, թե նախկիններից ոմանք։ Ամբողջ խնդիրն այն է, սակայն, որ Վարդազարյանը թիրախավորվեց այն բանից հետո, երբ հնչեցրեց իշխանությանը ոչ հաճո մի քանի հայտարարություններ ու հիմա կարող է տպավորություն ստեղծվել, թե իշխանությունն ազատվում է անցանկալի կադրերից ու դատական իշխանությունը կլանելու խնդիր ունի։
Համենայն դեպս, եթե չենք լսում իրավապահ մարմինների փաստարկված տեղեկատվություն հարուցված քրեական գործի մասին, նման կասկածը լեգիտիմ իրավունք ունի և պատահական չէ, որ այն հնչեցվում է անգամ իրավապաշտպանների կողմից, որոնք ամենևին էլ կապված չեն դատական համակարգի կամ այսպես կոչված, նախկինների հետ։
Իշխանությունն, իհարկե, պետք է պատասխանի ավելի գլոբալ հարցի։
ՍԴ-ում մի քանի դատավորների փոփոխության նախադեպը հուշում է, որ միայն անցանկալի կադրերից ազատվելը չի բերում ինստիտուցիոնալ բարեփոխումների։ Նույն պնդումը կարող ենք անել այս պարագայում։
Ի՞նչ ազդակ է Վարդազարյանի լիազորությունների դադարեցումը՝ բարեփոխումների մեկնա՞րկ, թե՞ հաշվեհարդար։ Այս հարցը դեռ բաց է մնում։
Բաժանորդագրվեք մեզ Youtube-ում
