Քոչարյանի թիմի «թույլիկ» պատասխանն ոչ ադեկվատ Փաշինյանին

Քոչարյանի թիմի «թույլիկ» պատասխանն ոչ ադեկվատ Փաշինյանին

«Հունիսի 18-ին Լևոն Տեր-Պետրոսյանին և Ռոբերտ Քոչարյանին հրավիրում եմ ուղիղ բանավեճի և այդ ժամանակ ամեն ինչ լավ կերևա: Փակ դահլիճներում հեշտ է տղամարդլամիշ լինելը: Կգաք, դեմ դիմաց կկանգնենք ու կխոսենք և բացատրություն կտաք, թե 97 թվին ինչի է Ղարաբաղի հարցը բանակցային գործընթացից դուրս մնացել»,– երեկ Լոռիի մարզում հայտարարել է վարչապետի ԺՊ Նիկոլ Փաշինյանը։
Նորմալ է, երբ Նիկոլ Փաշինյանը Լևոն Տեր- Պետրոսյանին ու Ռոբերտ Քոչարյանին հրավիրում է բանավեճի, բայց «տղամարդլամիշ» արտահայտությունը հուշում է, որ Փաշինյանի ուզածը «բեսեդկի ռազբորկան» է։
Ավելի հավանական է այն տարբերակը, որ Փաշինյանն առհասարակ բանավեճ չի ուզում և իր հրավերը միտումնավոր այնպես է ձևակերպում, որ դիմացինները մերժեն այն։
Մյուս կողմից, հունիսի 18-ին ընտրական գործընթացի բոլոր սուբյեկտների առաջին համարները բանավիճելու են։ Դա օրենսդրական պահանջ է ու այնքան էլ տեղին չէ, որ իր բազմաթիվ ընդդիմախոսներից Փաշինյանն առանձնացնում է հատկապես երկուսին։ Ըստ ամենայնի, փաստացի վարչապետը դարձյալ փորձում է խաղալ նախկինների հանդեպ հանրային ֆոբիաների վրա՝ ակնհայտորեն գերագնահատելով այդ գործոնը։ Համենայն դեպս, գործող իշխանության պրիմիտիվ քարոզչական տրյուկներն այլևս նախկին արդյունավետությունը չունեն։
Այնուամենայնիվ, ի՞նչ պետք է անեն Տեր-Պետրոսյանն ու Քոչարյանը։
Բանավեճից խուսափել որևէ պարագայում չի կարելի, մանավանդ, որ դա նաև օրենսդրորեն կարգավորվում է, բացի այդ՝ բանավեճերն այն կարևոր քաղաքական գործիքակազմն են, որը հասարակությանը կողմնորոշվելու հնարավորություն է տալիս։ Բանավեճից խուսափելը թուլության նշան է, եթե անգամ ընդդիմախոսդ Փաշինյանն է, որը, մեղմ ասած, չի փայլում քաղաքական կոռեկտությամբ։
Այս հարթության վրա առնվազն տարակուսելի է Քոչարյանի թիմի արձագանքը։
«Դավաճանների հետ չեն բանավիճում և քննարկումներ չեն ծավալում՝ նրանց պետք է ուղարկել գրողի ծոցը և վերջ։
Հունիսի 20-ին հայ ժողովուրդը դա կանի։
Դեպի ուժեղ Հայաստան»,- իր ֆեյսբուքյան էջում գրել է «Հայաստան» դաշինքի համամասնական ցուցակի երկրորդ համարը՝ Իշխան Սաղաթելյանը:
Նույն տրամաբանությամբ՝ «Դավաճանների հետ ընտրության չեն մասնակցում»։
Եթե համաձայնել եք Փաշինյանի հետ ընտրության մասնակցել, ուրեմն՝ ընդունել ենք որոշակի ֆորմալ և ոչ ֆորմալ խաղի կանոններ, որոնցից մեկն էլ բանավեճի մասնակցելն է։ Սա է քաղաքական մոտեցումնը, մնացածը հիշեցնում է «թույլիկ» պատասխան։

նման նյութեր