Մայրերի ափի մեջ պիտի
փնտրել ազգերի ճակատագիրը․․․
Գարեգին Նժդեհ
«Դեմոկրատական այլընտրանքն» օրեր առաջ իր արտահերթ համագումարում հնչեցրել է այն թեզը, որ մոտ ապագայում հանդես է գալու քաղաքական նոր այցեքարտով, հանրային և սոցիալական համերաշխության նոր բանաձևով, որտեղ առանցքային է լինելու կանանց ինստիտուցիոնալ, ներառական մասնակցությունը քաղաքական-հասարակական գործընթացին։ Այս համատեքստում «Դեմոկրատական այլընտրանք» կուսակցության քաղաքական խորհրդի գլխավոր քարտուղար Լիլիթ Սիլանյանը «Հավերժ հզոր Հայաստան» ՀԿ-ների դաշինքի համակարգող խորհրդի անդամ Կարինե Այվազյանի հետ քննարկել է փոխադարձ համագործակցության տեսլականը, որի նպատակն է իրազեկման ճանապարհով ՀՀ քաղաքացիներին վերադարձնել հավատը և հույսը ապագայի նկատմամբ, նրանց ընձեռնել հնարավորություն զգալու իրենց հասարակության լիիրավ անդամ, ավելին՝ զգալու սեփական երկրի առաջընթացի մեջ իր կարևոր դերն ու նշանակությունը։
Համավարակն ու 44-օրյա պատերազմը հայաստանյան հասարակությանը, կարծես, էլ ավելի պարփակեցին և մեկուսացրեցին։ Մարդիկ կորցրեցին հավատը վաղվա օրվա և խոստումնալից ապագայի նկատմամբ ու ստեղծված իրավիճակը լրացուցիչ առիթ հանդիսացավ այս երկու սեգմենտների լայն համագործակցության պատրաստակամության համար։
Ուշագրավն այն էր, որ թե՛ քաղաքական և թե՛ հասարակական այս ուժերը բավականին երկար ժամանակ փնտրում էին իրենց գաղափարակիցներին և հանգամանքների բերումով տեղի ունեցավ սպասված հանդիպումը։ Այս միավորումը պատրաստ է համագործակցության բոլոր այն ուժերի հետ, որոնց գլխավոր նպատակներից մեկն է հանրային համախմբումը, քանի որ դա է ճգնաժամի հաղթահարման կարևորագույն ելակետը։
Բաժանորդագրվեք մեզ Youtube-ում
