Քաղաքական մեկնաբան Հակոբ Բադալյանն իր ֆեյսբուքյան էջում գրում է.
Այսօր, երբ Ռուսաստանն ի վիճակի չէ պաշտպանել անգամ սեփական տարածքը՝ թե դրոնային հարվածներից, թե նաեւ դիվերսիոն գործողություններից, պատկերացնել, թե նրա խաղաղապահները ի վիճակի են լինելու անել դա Արցախում, մեղմ ասած մոլորություն է:
Ես էլ չեմ խոսում Ռուսաստանի քաղաքական մոտիվների մասին, որ պայմանավորված են Ադրբեջանի եւ Թուրքիայի գործոնով:
Միեւնույն ժամանակ սակայն, նույն կերպ մոլորություն է խոսել միջազգային մեխանիզմների մասին: Այսօր կա աշխատող միջազգային մեկ մեխանիզմ՝ ուժ, ում ուժն ինչ կպատի:
Եվ մոլորության մյուս հանգամանքն էլ ըստ իս դարձյալ մոտիվացիոն դաշտում է եւ արտահայտվել եմ բազմիցս, որ, միջազգային որեւէ առանցքային դերակատար չի ստանձնի իրավիճակի կայունության ֆորմալ պատասխանատվություն եւ այդ հարցում չի «թեթեւացնի» Ռուսաստանի բեռը, եթե չդիտարկենք նույնիսկ հակառակը՝ օգտագործել ապակայունացման ռիսկերը Ռուսասանի դեմ:
Սա չի նշանակում անշուշտ, որ մենք չպետք է խոսենք թե Ռուսաստանի մանդատային պատասխանատվությունից, թե միջազգային մեխանիզմների անհրաժեշտությունից եւ ընդհանրապեես միջազգային կառույցների ու դրա անդամների պատասխանատվությունից:
Բայց, սանտիմետրից մինչեւ կիլոմետր մեր անվտանգության խնդիրների լուծումը՝ լինի ռազմմական բաղադրիչով, դիվանագիտական, թե տնտեսական, կախված է մեր կարողությունից: Սա՝ այդ կարողության անընդհատ աճի եւ բազմազանության ապահովումը պետք է լինի մեր քննարկումների գերակայող գործոնը:
Բաժանորդագրվեք մեզ Youtube-ում
