Կուլիսներում

Կառավարական կաբինետն ամբողջանում է. նախարարական 12 աթոռներից 11-ն արդեն զբաղված են՝ կան վերանշանակումներ ու կան նոր նշանակումներ:
Թափուր է մնում արտգործնախարարի աթոռը: Երբ անվտանգության խորհրդի նախկին քարտուղար Արմեն Գրիգորյանը շաբաթներ առաջ նշանակվեց արտաքին գործերի նախարարի առաջին տեղակալի պաշտոնում, մամուլը գրեց թե Գրիգորյանը ապագա նախարարն է: Նշանակում առայժմ չկա:
Փաշինյանն, իհարկե, ցանկանում է նախարար նշանակել հենց Գրիգորյանին, բայց իշխանամերձ մեր աղբյուրներն ասում են՝ Մոսկվայից վարչապետին հասկացրել են, թե Գրիգորյանի հետ աշխատել չեն ցանկանում։
Հենց այս պատճառով է ուշանում Արմեն Գրիգորյանի նշանակումը։ Եթե Փաշինյանը ռուսների հետ լեզու չգտնի, չի բացառվում, որ Գրիգորյանը վերադառնա ԱԽ քարտուղարի պաշտոնին, իսկ ԱԳ նախարար նշանակվի Արարատ Միրզոյանը։

 
Գաղտնիք չէ, որ Արտակ Թովմասյանի(Դվինի Արտակ) «Երրորդ ուժ» նախաձեռնության հետևում կանգնած է Ռոբերտ Քոչարյանը։
Երկրորդ նախագահը, մի կողմից, փորձում է իր ներկայությամբ լցնել քաղաքական վակուումը ու սահմանազատվել ձախողված «Հայրենիքի փրկության շարժումից», մյուս կողմից՝ վարկաբեկում է նոր ուժի գաղափարը՝ կանգնելով քաղաքական և ինստիտուցիոնալ առումով իրապես երրորդ բևեռի ձևավորման ճանապարհին։
Ինչևէ, Արտակ Թովմասյանի «Երրորդ ուժը» խոստանում է գործող իշխանության հեռացմանը հասնել 44 օրում։ Անիմաստ է այս ժամկետի հետևում քաղաքական հաշվարկ կամ ծրագիր փնտրելը, վերցված է վերջին պատերազմի ժամկետը։ Սա մտածողություն է, որը բնորոշում է այս ուժին, որն օտարի, թշնամու հաղթանակը խորհրդանշող թիվն ուղեցույց է դարձրել իր գործունեության համար։

Մինչ ԳՇ-ն և ընդդիմությունը վիճարկում են Օնիկ Գասպարյանի պաշտոնանկության հիմքերը, իշխանությունն, ըստ ամենայնի, կողմնորոշվել է ԳՇ նոր պետի հարցում։
Երեկ ՊՆ նախարար Վաղարշակ Հարությունյանը այցել է ՊՆ հատուկ նշանակության զորամաս ու հանդիպում է ունեցել ԳՇ հետախուզության վարչության պետ, գեներալ-մայոր Առաքել Մարտիկյանի հետ։ Վերջինս ի պաշտոնե նաև ԳՇ պետի տեղակալ է ու այն քչերից է, որ չի միացել Նիկոլ Փաշինյանի ու կառավարության հրաժարականի պահանջին։
Ասում են՝ հենց Մարտիկյանն է ԳՇ պետի պաշտոնում Փաշինյանի «սրտի թեկնածուն»։ 

Փետրվարի 20-ի հանրահավաքը ու դրա հարաբերական հաջողությունը «Հայրենիքի փրկության շարժումը» պահպանելու միակ գրավականն են։
Բանն այն է, որ այս ձևաչափում հակասություններն այքան շատ են, որ հանրահավաքի ձախողումը վերջին կաթիլն է լինելու, որը քանդելու է շարժումը։
Այն բանից հետո, երբ ստվերից դուրս եկան շարժման հիմնական «կնքահայրերը»՝ Ռոբերտ Քոչարյանն ու Սերժ Սարգսյանը, շատերն են հասկացել, որ Վազգեն Մանուկյանն այլևս որևէ մեկին պետք չէ։
Մյուս կոսղմից, Քոչարյանի ու Սարգսյանի հրապարակային ելույթները դրսևորեցին նրանց հակասությունները ու հիմա երկրորդ և երրորդ նախագահները հեռակա պայքարի մեջ են, ինչն ավելի է խորացնում կենտրոնախույս տրամադրությունները «Հայրենիքի փրկության շարժման» ներսում։
Եվ վերջապես՝ ԲՀԿ-ն մի ոտքով շարժման մեջ է, մյուսով փորձում է իր ինքնուրույն օրակարգը ձևավորել ու շատերն են ասում, որ Ծառուկյանի թիմը պատրաստվում է լքել «փրկիչների» նավը։
Այնպես, որ վաղվա «հուժկու» հանրահավաքը կարող է վերջինը լինել շարժման համար։

Ոչ մի տարաձայնություն, ոչ մի ինչ-որ անհարթություն չի եղել, ամեն ինչ նորմալ էր, դա պարոն Պետրոսյանի սուվերեն որոշումն է։ Այս մասին Tert.am-ի հետ զրույցում ասել է «Բարգավաճ Հայաստան» խմբակցության քարտուղար Արման Աբովյանը՝ անդրադառնալով Գևորգ Պետրոսյանի՝ խմբակցությունից դուրս գալուն։

Հետաքրքիր իրավիճակ է։

Պետրոսյանն ասում է՝ ԲՀԿ-ից դուրս է  եկել այդ կուսակցության քաղաքական կոմֆորմիզմի պատճառով, Աբովյանը քաղաքական պատճառ չի տեսնում։

Մինչ հիմնական կողմերը սակավախոս են, ԶԼՄ-ներն առաջ են քաշում իրենց վարկածները։

Ոմանք պնդում են, որ Պետրոսյանը ԲՀԿ խմբակցությունից հեռացել է Ռոբերտ Քոչարյանի ցուցումով, մուսներն ասում են, որ ստվերային համաձայնություններ են ձեռք բերվել իշխանության և Ծառուկյանի թիմի միջև ու դրա «զոհը» դարձել է «արմատական» Պետրոսյանը։

Մեկ այլ վարկածի համաձայն էլ՝ քաղաքականություն է վերադառնում Ռոբերտ Քոչարյանը ու նրա առաջին քայլերից մեկը ԲՀԿ ներսից «պայթեցնելն» է։

 

Սոցապ նախարար Մեսրոպ Առաքելյանը, ով պաշտոնը ստանձնել է կապիտուլյացիայից հետո, օրերս հարցազրույցում դեմ էր արտահայտվել բարձրաստիճան պաշտոնյաների պարգևավճարներին։ Թերևս, Առաքելյանը չի էլ գիտակցել, որ անմեղ մի կարծիքով հակադրվել է «քայլող» իշխանության «գաղափարական սկզբունքերից» մեկին, համակարգային կոռուպցիայի այն դրսևորմանը, որի շուրջ համախմբվում է հեղափոխական բուրգը։

Մեսրոպ Առաքելյանի հարցով Նիկոլ Փաշինյանը հայտնվել է փակուղային իրավիճակում։

Նրա թիմակիցները պահանջում են պաշտոնանկ անել «այլախոհ» նախարարին։ Փաշինյանը հասկանում է, որ միայն պարգևավճարների թեմայով չի կարող «փուռը տալ» սոցապ նախարարին, սակայն քաջալերում է, որ իշխանական ֆեյքերը «սևացնեն» Առաքելյանին՝ հիշեցնելով նրա տնօրինությունը «Մոգոյում», վերջինիս հարստահարիչ վարկային քաղաքականությունը՝ չնայած երիտասարդ նախարարը վարկային այս կազմակերպության ոչ թե սեփականատերն էր, այլ ընդամենը՝ տնօրենը։

Չնայած աղմուկին՝ Մեսրոպ Առաքելյանի պաշտոնանկությունն այս փուլում գրեթե անհավանական է։ Բանն այն է, որ նա «Իմ քայլում» ՔՊ-ի դաշնակից «Առաքելություն» կուսակցության ղեկավարն է ու ԱԺ-ում վերահսկում է իր կուսակից չորս պատգամավորներին, որոնք կարող են լքել իշխանության խմբակցությունը, եթե Առաքելյանը հեռացվի նախարարի պաշտոնից։