Բայդեն

Վլադիմիր Պուտինը և Ջո Բայդենը համատեղ հայտարարություն են տարածել Ժնևի բանակցություններից հետո: Այն կապված է ռազմավարական կայունության խնդիրների հետ:
«Ռուսաստանը և Միացյալ Նահանգները ցույց են տվել, որ նույնիսկ լարվածության պայմաններում նրանք ի վիճակի են առաջընթացի հասնել համատեղ նպատակների իրականացման գործում` ռազմավարական ոլորտում կանխատեսելիություն ապահովելու, զինված բախումների ռիսկերը և միջուկային պատերազմի սպառնալիքները նվազեցնելու համար»,-ասված է փաստաթղթում:
«Այսօր մենք վերահաստատում ենք մեր հավատարմությունը այն սկզբունքին, որ միջուկային պատերազմում չեն կարող լինել հաղթողներ, և այն երբեք չպետք է սանձազերծվի», -ասված է համատեղ հայտարարության մեջ:
Ժնևում երեկ կայացել է Ռուսաստանի և ԱՄՆ-ի ղեկավարների ընդլայնված ձևաչափով հանդիպումը: Ըստ CNN- ի, Վլադիմիր Պուտինի ու Ջո Բայդենի բանակցություններն ընդհանուր առմամբ տևել են 3,5 ժամ:

ԱՄՆ նախագահ Ջո Բայդենը չի ափսոսում ՌԴ նախագահի մասին հարցին տված կտրուկ պատասխանի համար: Այս մասին հինգշաբթի կայացած ճեպազրույցի ժամանակ հայտնել է Սպիտակ տան մամուլի քարտուղար Ջեն Փսակին:
Նրան հարցրել են՝ ափսոսում է արդյո՞ք վաշինգտոնյան վարչակազմի ղեկավարը, որ դրական պատասխան է տվել ABC հեռուստաալիքի լրագրողի հարցին. «Կարծում է արդյո՞ք նա, որ Պուտինը մարդասպան է»: Պատասխանելով այդ հարցին՝ Փսակին ասել է. «Ո՛չ: Նախագահն ուղիղ պատասխան է տվել ուղին հարցին»:
Միևնույն ժամանակ, ՌԴ նախագահ Վլադիմիր Պուտինն ամերիկացի գործընկեր Ջո Բայդենին առաջարկել է ուրբաթ կամ երկուշաբթի բաց երկխոսություն անցկացնել պայմանով, որ այն կանցկացվի «գործնականում ուղիղ եթերում» և ազնիվ կլինի: Վաշինգտոնն առայժմ չի պատասխանել Մոսկվայի այս առաջարկությանը։

Ռուսաստանի նախագահ Վլադիմիր Պուտինը «Ռոսիա 24» հեռուստաալիքի եթերում ԱՄՆ նախագահ Ջո Բայդենի՝ իրեն «մարդասպան» որակելուն ի պատասխան վերջինիս առողջություն է մաղթել: ։
«Ինչ վերաբերում է իմ ամերիկացի գործընկերոջ հայտարարությանը, մենք իսկապես, ինչպես նշել է նա, անձամբ ծանոթ ենք։ Ես կպատասխանեի նրան՝ առողջ եղեք»,-ասել է Վլադիմիր Պուտինը՝ ընդգծելով, որ դա ասում է «առանց հեգնանքի և կատակի»։
ՌԴ նախագահը նաև հավելել է․ «Ով նման վիրավորական բան է ասում, հենց ինքն է այդպիսին»։
Ավելի վաղ Բայդենը ABC News-ին տված հարցազրույցում հայտարարել էր, որ Ռուսաստանի նախագահ Վլադիմիր Պուտինը «կվճարի 2020 թվականին ԱՄՆ-ի նախագահական ընտրություններին միջամտելու համար»։ Հարցին, թե ինչ հետևանքներ կլինեն, նա պատասխանել էր. «Շուտով կտեսնեք»։
Նա նաև նշել էր, որ լավ է ճանաչում Պուտինին։ Նրա խոսքով՝ «Պուտինը հոգի չունի»։ Հարցին, թե արդյոք կարծում է, որ ՌԴ նախագահը մարդասպան է, վերջինս պատասխանել էր․ «Այո»։
ՌԴ նախագահի մամուլի քարտուղար Դմիտրի Պեսկովը, մեկնաբանելով ԱՄՆ նախագահ Ջո Բայդենի`Վլադիմիր Պուտինի հասցեին մեկնաբանությունները, ասել էր․ «Նա, միանշանակ, չի ցանկանում հարաբերություններ հաստատել մեր երկրի հետ, և հետագայում ելնելու ենք հենց դրանից»։

Սպիտակ տունը հրապարակել է Միացյալ Նահանգների նորընտիր նախագահի ծրագիրը ազգային անվտանգության և արտաքին քաղաքականության ոլորտում։
24-էջանոց այդ փաստաթղթում Ջո Բայդենի վարչակազմն ընդգծում է՝ առաջիկա չորս տարիներին Վաշինգտոնի առաջնահերթությունն է լինելու ժողովրդավարության ամրապնդումն աշխարհում և Նահանգների վերադարձը միջազգային ասպարեզ։
«Ես խորապես համոզված եմ, որ ժողովրդավարությունը ազատության, բարեկեցության, խաղաղության և արժանապատվության բանալին է: Եվ եթե մենք աշխատենք մեր ժողովրդավար դաշնակիցների հետ՝ վստահությամբ և հաստատակամությամբ, կարող ենք արձագանքել ցանկացած մարտահրավերի», – հայտարարել է նախագահ Բայդենը։
Սպիտակ տան ղեկավարը նաև հայտնել է, որ պատրաստվում է ժողովրդավարության հարցով համաշխարհային գագաթնաժողով հրավիրել, որպեսզի ապահովի դաշնակիցների միջև ընդարձակ համագործակցությունը։

 

ԱՄՆ 46-րդ նախագահ Ջո Բայդենի քաղաքականության առաջնահերթություններն են լինելու պայքարը կորոնավիրուսի դեմ, կլիման, ռասայական անարդարությունը, տնտեսությունը, առողջապահությունը, ներգաղթը և ԱՄՆ դիրքերի վերականգնումն աշխարհում: Այս մասին ասվում է Սպիտակ տան տարածած հայտարարության մեջ:

Սպիտակ տունը հայտնում է նաև, որ Ջո Բայդենն ԱՄՆ նախագահի կարգավիճակում ստորագրել է առաջին որոշումները:

ԱՄՆ-ն վերադառնում է Կլիմայի շուրջ փարիզյան համաձայնագրին: Մեկ այլ հրամանով՝ կասեցվել է Կանադայից Keystone XL նավթամուղի կառուցումը՝ չնայած Օտտավայի կողմից նախագծի աջակցմանը:

Բայդենը չեղարկել է Թրամփի կողմից ամերիկա-մեքսիկական սահմանին ստեղծված իրավիճակի հետ կապված արտակարգ դրություն հայտարարելու մասին որոշումը:

Այս պահին Վաշինգթոնում տեղի է ունենում ԱՄՆ 46-րդ նախագահ Ջո Բայդենի երդմնակալության արարողությունը։

Ավելի վաղ ԱՄՆ գործող նախագահ Դոնալդ Թրամփը Միացյալ Նահանգների ղեկավարի կարգավիճակում ունեցած վերջին ելույթում ընդունել է Բայդենի հաղթանակն ու հայտարարել, որ աղոթում է նոր իշխանության հաջողությունների համար։ «Ցանկանում եմ, որ իմանաք՝ մեր սկսած շարժումը դեռ նոր է մեկնարկում»,- հայտարարել է Թրամփը:

Թրամփն ասել է նաև, որ հունվարի 6-ին Կապիտոլիումի շենքի վրա հարձակման տեսքով արտահայտված քաղաքական բռնությունը որևէ կերպ չի կարող արդարացվել:

Սակայն հենց հունվարի 6-ի սկանդալային իրադարձություններն էապես ազդեցին Թրամփի հեղինակության և վարկանիշի վրա։ Ըստ սոցիոլոգիական հարցումների՝ ԱՄՆ բնակիչների 47 տոկոսը համոզված է, որ Թրամփը կհիշվի որպես ԱՄՆ վատագույն նախագահներից մեկը: Միևնույն ժամանակ, հարցման տվյալներով՝ Թրամփի ժողովրդականության մակարդակը կազմում է 38 տոկոս, որն ամենացածր ցուցանիշն է նրա նախագահության ողջ ընթացքում։
Այնուամենայնիվ, ԱՄՆ-ը երբեք այսքան երկփեղկված ու բաժանված չի եղել ու շատ փորձագետներ նշում են, որ Թրամփն ունի մեծաթիվ կողմնակիցներ ու չի բացառվում, ոչ միայն նրա կողմից քաղաքական շարժում գեներացնելը, այլ նաև՝ նոր նախագահի ինագուրացիայի օրը կամ դրանից հետ բողոքի ակցիաների անցկացումը։

Ինագուրացիային նախորդող ու հաջորդող բողոքի ակցիաները նոր երևույթ չեն ԱՄՆ քաղաքական պատմության մեջ։

2017-ին Թրամփի ընդդիմախոսները մի քանի օր շարունակ բողոքի ակցիաներ անցկացրեցին, իսկ ինագուրացիայի նախորդ օրը Նյու-Յորքում մեծ երթ իրականացրեցին, որին մասնակցեցին հոլիվուդյան մի շարք աստղեր։

Թրամփի ինագուրացիայի օրը մի խումբ մարդիկ փորձել են վիժեցնել այն, ինչին հետևել են ոստիկանության կոշտ գործողությունները։ Թրամփի ինագուրացիայի հաջորդ օրը Վաշինգթոնում կանայք են երթ անցկացրել՝ նորընտիր նախագահի սեքսիստական հայտարարությունների դեմ։

2005-ին, Բուշ-կրտսերի երկրորդ ինագուրացիայի օրը, տասնյակ հազարավոր մարդիկ ցույց են արել՝ բողոքելով Իրաքում ընթացող պատերազմի դեմ։

2001-ին, Բուշ-կրտսերի առաջին ինագուրացիայի ժամանակ, նրա ավտոշարասյան ուղղությամբ ձվեր ու թենիսի գնդակներ են նետվել։ Մարդիկ բողոքում էին վիճահարույց ընտրությունների դեմ։

1969-ին Նիքսոնի ավտոշարասյան վրա նետվել են քարեր, շշեր։ Ակտիվիստները պահանջում էին ամերիկյան զորքերի դուրսբերումը Վիետնամից։